Cueva l'Arquera (o de las Inxanas o del Barcón)

(VB-04)
Santoveña, Vibañu, Llanes, Asturies

Grupu d’Espeleoloxía Gorfolí
Sociedad Espeleológica y Barranquista Escar
Asociación Deportiva Cuasacas
2009-2011

Desendolcu: 894 m.
Desnivel: 60 m. (+52/-8)
(topo parcial a primeru de xineru de 2012)

Coordenaes: 30 T X: 347.007, Y: 4806.640, Z: 60 m. (Dátum WGS84)

Asitiamientu: Asítiase nes cercaníes de Santoveña, parroquia de Vibañu, Conceyu de Llanes, baxu’l camín que dende Santoveña empobínase al Oyu’l Ríu.

Xeoloxía: Roca caliar, prieto y llaminao (Formación Barcaliente), del Carboníferu superior (Namuriense). La cavidá paez desendolcase en bona midía a favor d’un frente de cabalgamientu

Descripción: Baxo un ramal que dende’l camín mencionáu baxa al ríu ábrese la boca d’esta cueva. El primer tramu de galería ye un sifón temporiegu yá que a final del branu suel baxar el nivel y permite’l pasu ensín merguyar, col agua al altor de la cintura. Tres unos 10 m. el techu llevanta y les parees tan cubiertes por colaes. La galería continúa con medianes dimensiones dica llegar a una sala más grande ocupada pela poza de un segundu sifón. Tamién se puede llegar a esta sala esguilando a una galería cimera más amplia y baxando dempués un pocín de pocos metros.
El segundu sifón tien una seción amplia, de unos 2,5 m. de diámetru. El fondu ye de sable y grava, y tres un percorríu de 55 m. con una fondura másima de 5 m. termina n’una galería aeria nortiada a 360 º N. El restu de les galeries percorríes dica equí llevaba un marcau rumbu este. La galería tien unos 3 mts. d’altor, con pasu a un pisu cimeru colmatáu per barru que paez haber tapao una salida al esterior. Continuando pel agua la galería torna otra vegada al oeste, con mayores dimensiones y el suelu de barru. A los pocos metros atopamos un cruce de galeríes. Una rampla ascendente llévanos a una sala con abondes formaciones escéntriques de gran belleza y que termina cerrando, magar qu’hai delles gateres ente les formaciones. Continuando al nivel del agua entama un meandru con delles partes estreches pero cómodes que tres d’unos 50 m. termina n’una sala más amplia col suelu de costeros. Esti meandru solo puede ser percorríu na época de seca, al final del branu, ya que’l restu de vegaes siempre lu atopamos somorguiau. Na sala nomada anteriormente entama una corta galería muncho más grande que dexa a la manzorga una rampla de sable y barru ascendente y que tres unos 15 m. de percorríu fina n’una sala col fondu ocupáu pela poza del 3º sifón.

Subiendo pela rampla de sable alcontramos a la manzorga un furacu al qu’hai qu’esguilar y da pasu a una sala cimera más grande col suelu de grandes costeros. Ente los costeros hai un pozu que comunica cola sala fondera tres del meandru. La galería continua dica l’este, sobre’l meandru fonderu pero dexa a la manzorga (rumbu sureste) un balcón onde esguilamos unos 5 m. pa descubrir que la cavidad continúa tamién per equí subiendo per una resquiebra con abondes formaciones. Tres d'una esguilada artificial d’unos 15 m. algámase una repisa dende onde vese que la chimenea se cierra, marcando'l puntu más altu de la cueva pel momentu, cota +52 m.
Continuando dende la sala de los costeros grandes, pal este entama una pequeña galería que termina comunicando cola galería onde entama’l meandru somorguiau. Esta sala de los costeros y esta galería tan abiertes a favor de la mesma resquiebra que más abaxu fai el meandru.

El tercer sifón entama con una rampla de grava perpindia que darréu lleva a 10 m. de fondura pa de seguíu entamar a subir dica otra nueva galería aeria. Tien un recorríu de 45 m y 10 m. de fondura másima.
Na poza del otru llau del tercer sifón entama un meandru estrechu na so parte cimera pero un poco más anchu cerca del suelu que permite avanzar a gates cuando la cueva tien un nivel baxu d’agua.  Cuando l’agua xorrez nun ye posible percorrer esta galeria ya que esta parte somorguiase y les dimensiones nun permiten merguyar. Tres unos 170 m de meandru un poco más cómodu qu'al entamu algamase la poza del cuartu sifón. 
Esti sifón ye pequeñu, malpenes 5 m. de llargo a menos de 1 m. de fondura. Al otru llau una pequeña sala de techu altu y dimensiones cómodes continua per una diaclasa que da pasu a una galeria de grandes dimensiones, les mayores de la cavidad, más de 10 m. d’altura por unos 6 m. d’anchura. Equi entama una rampla de barru y costeros que sube unos 20 m. de desnivel, alcontrando na so parte cimera restos vexetales. Al pie de la rampla y baxando ente costeros alcontramos un cortu cachu de riu que tres d’una curva llevanos a la amplia poza del 5º sifón, punta de la exploración anguaño.

Hestoria: La cueva ye conocía de forma tradicional pola xente de Vibañu y Santoveña, incluyío el tramu tres del primer sifón temporiegu. A nivel espeleolóxicu les esploraciones entamen de la mano de la S. E. Hades, d’Uviéu, qu’en 1990 esploren la cavidá en agües baxes, topografiando hasta la poza del segundu sifón, y asoleyando la reseña y topo la cueva nel boletín Filtraciones nu 14 (J.L. Díez Dizy & J.L. Del Río: Nuevas aportaciones al catálogo de Llanes). La S.E.B. Escar toma contautu cola cueva nel añu 2009, y tres de revisala y de prospectar les posibilidaes de merguyu nel segundu sifón acuden a los compañeros del G.E. Gorfolí, qu’entamen nel branu de 2010 les esploraciones subacuátiques na cueva. Les esploraciones continúen dafechu nel tardíu ya iviernu d'esi añu y nel 2011, cola collaboración asina mesmo de la A.D. Cuasacas.

Toponimia: La cueva nómase de “l’Arquera”, de xuru en rellación col arcu (o arquera) qu’iguáu como una armadura protexe’l camín que cruza perriba la boca la cueva. La cavidá nómase tamién como “Cueva’l Barcón” y asina mesmo como “Cueva las Inxanas”, en rellación col espardíu tema mitolóxicu asturianu. Ye remarcable que seya nomada “cueva” y non “h.uente” o "poza".

Andecharon nos trabayos: Pela parte de la S.E.B. Escar andecharon Darío Alaiz, Gonzalo Sánchez, Beatriz Santa Cruz y Pablo Solares; pela parte del G.E. Gorfolí trabayaron na esploración y topografía Xesús F. Manteca, Rafa Bernardo, Enol Bernardo, Poli Trabanco, Isidro Baides, Fran Solís, Alberto Medina, Aurora Manteca y Oscar Cuadrado; y pela parte de la A.D. Cuasacas echó un gabitu Ángel García Madrera. El testu de la presente reseña ye autoría de Xesús F. Manteca y de Pablo Solares, y les semeyes que l’acompañen son del primeru d’estos y de Rafa Bernardo y Gonzalo Sánchez.

- Topografía -

- Poligonal proyectao sobro la ortofoto -

Cabera actualización: 1 de febreru de 2012

- Esploración en cursu -